Venecuelanska nacionalna organizacija omladinskih i dječjih orkestara, poznata kao "Sistem", postavila je novi Ginisov rekord za najveći orkestar na svijetu, saopštila je vlada te zemlje.

Oko 12.000 muzičara je prošle nedjelje više od pet minuta sviralo "Slovenski marš" Petra Iljiča Čajkovskog, čime su oborili Ginisov rekord koji je postavio ruski orkestar prije dvije godine, prenosi Rojters.

Ministar informisanja Venecuele Fredi Nanez i ruski ambasador u Karakasu Sergej Melik Bagdašarov čestitali su muzičarima u obraćanju na državnoj televiziji.

I ekspert za Ginisovu knjigu rekorda Suzan Rejes objavila je da su venecuelanski muzičari bili uspješni u postavljanju novog rekorda.

Iz Ginisove knjige nisu odgovorili na Rojtersovu molbu za komentar.

"Slovenski marš" ili "Srpsko-ruski marš" inspirisan je Srpsko-turskim ratom 1876. godine, kada se veliki broj ruskih dobrovoljaca borio na strani Srbije.

Video: TeleSUR English